خمــيس العهـــد/ سمير عدلي


لمــا اتـولـد يســوع الناس ماعــرفــوش ايه معـنــاه
أتاريــه كان جـــــاى علشــان يرفع عنـهم المعانـــاه
كل واحد كان يشتــكى ويئن من حياته ومن خطايــاه
وطمنهم المعمدان لما شــاور عليه وقال دا حمــل الله
ـــــــــــــــــــــــــــــــــــــــــــــــــــــــــــــــــــــــــــــــ
عاش يســوع بين الجـمــوع قــعــــد معــــاهم وجال
إبتدا يعــلم ويشــفى المرضى منــهم النسا والرجــال
ويفهّم الشباب معنى الحياه ويضم فى حضنه العيال
وقال جاى اريحكم يا جميع المتعبين وثقيلى الاحمال
ــــــــــــــــــــــــــــــــــــــــــــــــــــــــــــــــــــــــــــــ
شفـى المرضـى وقـــوم الميـــت وقــــوم المنحنـين
اتلـم حواليـه الناس لما شافوا الحب ولمسوا الحنين
طبعا الكلام ده ماعجبش اليهود الكتبة والفريسيــين
اتفقوا يسلموه حسـداً للحكـام الاجانب الرومانيــيــن
ـــــــــــــــــــــــــــــــــــــــــــــــــــــــــــــــــــــــــــ
وف مرة اتكلم . وعـظ يســوع وجــت جمـــوع كتير
من حلاوة الكلام مَر عليهـم وقـت فعــلا كان طويــل
شفق عليهم وشبعــهم بسمـكتين و5 ارغفـة شعــير
وبعــدها قالـهم اجمعــوا الكســــر فملوا 12 زمبـيل
ــــــــــــــــــــــــــــــــــــــــــــــــــــــــــــــــــــــــــــــ
مرت السنـين والأيـــام ولمـــا جـــه الوقــت والأوان
هتف النـــاس ليســـوع وهو راكب جحـش ابن اتـان
فرشوا هدومهم ورفعوا صوتـــهم مـع الاغـصـــــان
خلصنــاـ خلصنـــا ـ يامـلك وحـــــررنا من الـهـــوان
ـــــــــــــــــــــــــــــــــــــــــــــــــــــــــــــــــــــــــ
بعدها بكـــــام يوم اتجمــــع كل الاهـــالى والضيوف
نفس الايدين اللى صرخت قبل كده ورفعت السعوف
هى نفسـها اللى صرخـت وهى بتـــلـوح بالسيـــــوف
وقال قيــافـــا أفضل يمـــوت واحد بدل مايموت الوف
ـــــــــــــــــــــــــــــــــــــــــــــــــــــــــــــــــــــــــ
قبلها كان يوم خميس لكنــه كان خمــيس غير عادى
زى النهارده مع التلاميذ جلس يسوع المسيح الفادى
لم حوالــيه تلاميذه وكان هو وسطــهم يعلـم وينادى
تعالــوا نشوف إيه اللى عمـله يسوع فى اللـيــلـه دى
ـــــــــــــــــــــــــــــــــــــــــــــــــــــــــــــــــــــــــــــ
قالهم روحـوا اسبقونى وجهـــزوا العشاء فى العُلِـيه
رتبوا الجـلسـه والعشــا واعملوا مكان ف الوسط لي
ولما حاتكلــم انســوا نفســـكم واصغــــوا كويـس لي
واحفظوا كل اللى حاقوله علشان تعلموه للناس بعديّ
ـــــــــــــــــــــــــــــــــــــــــــــــــــــــــــــــــــــــــــــــــ
وللى حصل ان التلاميـــذ فـكــروا مين الكبـيــر فيـهم
ابتدوا يتشاجروا ويســألوا مين يبــقى الزعيــم ليهم
ولما بص لهم يسوع عرف الفكر اللى كان ف عنيهم
وعشان يعلمهم الدرس اخذ المنشفة وغسل رجليهم
ــــــــــــــــــــــــــــــــــــــــــــــــــــــــــــــــــــــــــــــ
حاول كل واحـد يمنــع يســـوع وحــاول يمسك ايده
اصل غسيـل الرجـلين كان يعملـــها العبـد مع سيـده
فهـم التلاميذ الدرس وكل واحـد كتـب بعـــدها بإيـده
وقالـوا ان خدام ربنـا لازم يكــونوا ف الاول عبيـدُه
ــــــــــــــــــــــــــــــــــــــــــــــــــــــــــــــــــــــــــ
قالـهم يســـــوع بعد مانــاكل بكـره هـايصلـبـــــونى
ح يقبض عليّ العساكر الليـله وللحكام ح يسلمــونى
قام اخذ يسـوع الخبز ورفعـه وكسـر وقال اسمعونى
لما تجتـمعوا مع بعضـكم اعمــــلوا كــده واذكــرونى
ــــــــــــــــــــــــــــــــــــــــــــــــــــــــــــــــــــــــــــــ
بعـدها صب يســـــوع الخـمـر ورفـــع قدامهـم الكاس
قالـهم بكره ح يسيـــل دمي على الصـليب قـدام الناس
فيهم اللى ح يقَـَدَره وفيهم اللى ماعندهــوش احساس
لكـن دمى ح يغـفــر الخطيـه لكل الشــعوب والاجنـاس
______________________________
قعد معـــاه التلاميـــذ وقالــــوله احنا كلنــا حواليـــك
اوعى تنـعى الهــم دا احنــا بنحـــط ايدينـــا ف ايديك
وقالُه بطـرس ماتخـفش مش حاسيبــك انا بين ايديك
قالُه يسوع خلى بالـك وانتبه لو سمعــت صياح الديك
ـــــــــــــــــــــــــــــــــــــــــــــــــــــــــــــــــــــــــــــــ
رفـع يسوع الكـاس وقال حاعمـل معاكـم عهــد جديد
حاكمـل النامـــوس وارفـع من عليــكم حكمه الشـديد
اللـى كان مقيـدكم وحاكمــكم بقبـــــضه مـن حـديــــد
حاحـطم قيـــودكم واحرركم وتبقـوا احباء مش عبـيد
ـــــــــــــــــــــــــــــــــــــــــــــــــــــــــــــــــــــــــ
بعـدها راح يسـوع يصــــلى فى بستــــان جثسيـمانى
كان معـاه التلاميــذ وقـال لبطـرس معاهم استنـــــانى
يهوذا ماكـنش معـــاهم اصله كان خـائــن وحــــرامى
قال للجنود امسكـوا الراجل اللى حاخده فى احضــانى
ـــــــــــــــــــــــــــــــــــــــــــــــــــــــــــــــــــــــــــــــــــــ
وانت خـالى بالك النهــارده قبل ماتاكل الخبـز وتشرب
ان يسوع زى النهــــارده كان يـقــدر يمشى ويهـرب
الليله دى افتكر قبل ماتمد ايدك تاخــد الكاس وتشرب
علشان يسوع يسقيك الهنا هو الخل المر كان بيشرب
ـــــــــــــــــــــــــــــــــــــــــــــــــــــــــــــــــــــــــــــــــ
اوعى تبص على يسوع المصلوب وتُقعد تبكى عليه
انت محتاج بس انـك تشـوفه وتحط عيـنك في عنـيه
هو مش عايز غيـر قلــبك انت وتحـط كل ثقــتك فيـه
دى خطيـتك ح تتـغـفر وتـتـنسى لو فتـحت قلـبك ليـه
ــــــــــــــــــــــــــــــــــــــــــــــــــــــــــــــــــــــــــــــ
تعالى وقوله من قلـبك انا ندمــان على كل اللى فـات
غمض عينيك دلوقتـى وصلـى وسـلم له كل اللـى آتْ
قوله تعالى وعوضنى عن السنـين اللى اكلها الجراد
وضمـنى اليـــك ياسيدى المســــيح يامخلـص العباد
وفى النهاية :
يسوع راح يسعدك هو وحده ............... Enough

عاوز قلبك كله مايحبش ياخد ال................. Half

اوعى تنشف دماغك ويكون قلبك............ Rough

ده هو بيحبك دا حتى اسمه...................... Love
ـــــــــــــــــــــــــــــــــــــــــــــــــــــــــــــــــــــ

CONVERSATION

0 comments:

إرسال تعليق